أنظمة إدارة البطاريات Battery Management Systems

سلام عليكم

الحمد لله النهاردة قررت اني أبدأ في عمل توثيق Documentation للخطوات اللي نفذتها في عمل Reverse Engineering للـ BMS في بطارية اللاب توب وان شاء الله هأشارك كل خبرتي في المجال ده لأي حد حابب يستفيد.

للأسف المجال ده صعب تلاقي حد بيتكلم فيه لانه ( مصدر أكل عيش للناس في المجال ده ومش بيطلعوا معلومة إلا بمبالغ مادية كبيرة لان بيبقى ده نتيجة خبرة كبيرة ومجهود مبذول ، كمان بردو المجال بيحتاج خلفية كبيرة في مجال الهاردوير والهندسة العكسية ومعدات خاصة ).

ليه أصلاً بطاريات الليثيوم بيكون معاها Battery Management System ؟
اول حاجة لازم نعرف ان بطاريات الليثيوم بتحتوي على طاقة كبيرة ومخزنة في حجم صغير ( حجم البطارية ). ف لازم يتم شحنها وتفريغها باسلوب صحيح وكمان بردو لازم يتم توفير دوائر حماية ليها لاقدر الله لو حصلت أي مشكلة فيها بتؤدي إلى حريق هائل. بردو الـ BMS بيوفر مجموعة معلومات اقدر اعرفها عن البطارية زي حالتها وجهدها ودرجة حرارتها وفاضل وقت قد ايه على ما تخلص وفاضل وقت قد ايه على ما تنتهي عملية شحنها. وجهد كل خلية بطارية وكمان سعة البطارية ونسبة شحنها كام. اكيد كل دي معلومات مفيدة اقدر استفيد بيها في مجالات لا حدود لها.
 
مين المستفيد من الهندسة العكسية لبطاريات اللاب توب ؟
1- أي حد عاوز يعمل Electric Vehicles ك مشاريع ضروري قوي يفهم مبدأ عمل الـ BMS.
2- أي حد عاوز يعمل DIY Power walls ودي مكونة من باور بانك عملاق من بطاريات الليثيوم وبيتم شحنها من خلال الطاقة الشمسية وكمان تقدر تشغل بيها المنازل.
3- أي حد عاوز يعمل UPS Based Systems بكل انواعها. هاتستفيد قوي من فهمك للـ BMS.
4- لو عاوز تعمل باور بانك لـ System ما .؟!
5- لو انت عاوز تصمم أي مشروع وعاوز تعمل Estimation للبطارية فاضلها قد ايه على ما تخلص، او لو عاوز تعرف حالتها وهل هي يعتمد عليها عشان تنفذ الـ Task المطلوب ولا لأ ؟.
6 – أكيد لو احنا فهمنا الهندسة العكسية ليها مستقبلياً هايكون عندنا خلفية لما الـ Electric Vehicles تنزل السوق المصري ويتعمل اعادة تدوير للبطاريات بيتاعتها اكيد هانستفيد بيها في مجالات كتيرة وهاتفتح فرص كتيرة.
7 – لو عاوز تكتسب Skills في ربط الـ BMS مع الـ Embedded Systems وانك تعمل نتورك بين مجموعة من البطاريات وتكلمهم وتعرف حالتهم مثلاً.
 
هانلاقي في الاخر ان هايكون في اتاحية لنوعية كبيرة من المشاريع المفيدة واللي ممكن تكون فكرة Start Up أو حتى افكار مشاريع تخرج.

المقالات

Up ↑