نصائح للطلبة قبل التخرج

سلام عليكم 😅

دي مجموعة نصائح للطلبة قبل التخرج ياريت تبصوا عليها كويس جداً لإني بألاحظ الحاجات كتير وأتمنى انكوا تشوفوها وتتعلموا منها. عارف إن البوست طويل لكن صدقوني هايكون مفيد لأقصى درجة تتخيلوها.

أول نصيحة:
الكلية بتدرسلك مواد وعلوم أساسية (أساسي إنك تتعلمها عشان لو حبيت تتعلم أي مجال أو أي مادة بعد كدة تقدر تفهمها). مافيش إنسان تعليمه بينتهي بعد التخرج. اللي انت اتعلمته في الكلية ده مش كافي لسوق العمل نهائي. بعد التخرج إنت لسة يدوب بتقول بسم الله وبتستفتح على العالم بعد كدة. هاتفضل طول حياتك بتتعلم صدقني.

المواد اللي انت بتتعلمها مرتبطة ببعضها ترابط تام وفي معنى هندسي Engineering Meaning وكمان تطبيقات Applications لكل حاجة بتتعلمها. ممكن اللي بيدرسلك المادة يقولك الحاجات دي وممكن لأ. ف لازم انت تفهم الكلام ده وتحاول تدور بنفسك وتحاول تفهم تطبيقات كل حاجة بتدرسها.

ثاني نصيحة:
في مهارة مهمة لازم تكون متقنها وبتجيدها أكتر من أي حاجة تانية. ألا وهي مهارة كيفية البحث عن المعلومة. صدقوني الدنيا بعد التخرج صعبة وصعب تلاقوا حد يقدر يبذل معاكوا مجهود كبير ويكون باله طويل إلا لو شخص بجد إبن حلال لكن ده نادر. حاول تعتمد على نفسك. الدنيا بعد التخرج مافيهاش رحمة. لازم تكون فاهم المصطلحات الخاصة بمجالك باللغة الانجليزية. مثال مثلاً المصطلحات الهندسية بالإنجليزي لو استخدمتها في أي Search على الانترنت هاتلاقي المعلومة بتظهرلك بسهولة. حاول تخلي كلمة البحث بيتاعتك محددة وواضحة لمحرك البحث هاتظهرلك النتيجة بسرعة. الدنيا بعد التخرج مش سهلة.

ثالث نصيحة:
اتعلم يكون بالك طويل. ماتحاولشي تتخنق بسرعة لو في مشكلة بتواجهك في مشروع ما ومش عارف تحلها. حاول تحلها وتبحث بكل الطرق حاول دايماً تبحث عن حلول لكل مشكلة بتواجهها (هاتعرف ليه في النقطة اللي جاية).

حاول دايماً ماتتعاملشي مع المشكلة اللي معاك على إنها مشكلة وخلاص. لو عندك مشكلة في System معين زي IOT System مش راضي يشتغل. ماتقولشي ده مش راضي يشتغل وخلاص. حاول تتعمق شيوية وتعزل المشكلة وتحدد مكانها بالظبط. لازم يكون عندك Debugging Skills ولازم يكون عندك Problem Solving Skills. حاول تكسر الـ System لأجزاء صغيرة وتشوف كل جزء شغال ولا لأ. اللي بيقدر يوصل للنقطة دي هو اللي بيجرب بإيده كتير. الشركات في الآخر بتدور على الأشخاص اللي عندهم الـ Skills دي !! آه والله 😂.

رابع نصيحة:
وانت صغير دايماً كنت بتيجي لغيرك بالمشاكل. المفاجأة اللي عاوز أقولهالك إنك كل لما تكبر هايتطلب منك تقدم حلول مش تقدم مشاكل !!. تخيل كدة لو انت Senior او Team Lead هل هاتقدر تقول لمديرك انك عندك مشكلة وبس!؟ انت المفروض بتحل المشاكل أصلاً 😂. اللي هايقدر يتعايش في المرحلة دي هو اللي عنده خبرة واللي اكيد بيقدر يوصلها (اللي بيبحث عن المعلومة).

خامس نصيحة:
حاول انك يكون ليك هدف واضح وانت في بداية الدراسة. حاول يكون عندك شغف بمجال ما وحاول دايماً تدور على ده بدري. لو فضلت مستني لحد اخر سنة في التخرج هايبقى الموضوع صعب.

مرحلة الدراسة انت المفروض بتتعامل مع كل الطلبة اللي أكبر منك وعلى الأقل بتشوف ناس شغالة في مجال ما وممكن ده يخليك تنجذب لمجال ما. حاول تنزل تدريب في الشركات وتختلط بالناس. ماتخليش فترة الدراسة تضيع في الهزار والخروج وتضييع الوقت. كل حاجة بحسابها.

دلوقتي السوق بقى فيه تنافس كبير وسقف المتطلبات في اغلب الوظائف ارتفع واللي بجد هاينجح اللي بيجهز نفسه لسوق العمل من بدري. و ماشاء الله هايشتغل بسرعة، ربنا مش بيضيع مجهود حد.

سادس نصيحة:
لو انت طالب هندسة حاسبات او اتصالات او أي تخصص بيدرس مجال الإلكترونيات حاول تتعلم وتدرس المجال حتى ولو انت كارهه. هاييجي يوم من الأيام صدقني وهاتحتاج تتعلم هاردوير. ممكن تضطر إنك تتعلم ده في مشروع التخرج وياما طلبة لقيتهم بيحاولوا يتعلموا ده ومشروع التخرج أجبرهم انهم يتعلموا التعامل مع الهاردوير.

اللي بيتعلم مجال الهاردوير هايقدر يشوف الدنيا حواليه بمنظور تاني خالص. ازاي تفهم ال Computer Architecture بجد وتفهم نظرية عمل مكوناته. ازاي تفهم الميكروكونترولر اللي انت شغال بيه ده الـ Architecture بيتاعه بالتفصيل. بلاش ندور على الزيتونة وخلاص.

عاوز أقولكوا ان في طلبة حرقت Raspberry Pi سعرها معدي الـ ٥٠٠٠ جنيه بسبب غلطة كارثية بالمعنى الحرفي وده نتيجة عدم بحثهم الجيد عنها وطريقة التعامل معاها وإهمالهم. لو هاتتعامل مع حاجة زي كدة لازم تنسى اللي اتعلمته في الكلية. ماتستخدمشي LM7805 Voltage Regulator ولا Voltage Divider. هنا الدنيا مختلفة والغلطة ممكن تخسرك البوردة بالكامل.

في الهاردوير ماينفعشي تستعجل. فكر كويس وفكر ألف مرة قبل ماتشغل الباور سبلاي لأي Circuit إنت منفذها لو هي غالية وخد كل احتياطاتك.

سابع نصيحة:
المعدات المعملية اللي عندك في الكلية لازم تتعلم ازاي تشتغل عليها. في كليات فيها معدات معملية مش موجودة في الشركات!!. دي فرصة لا تعوض خالص ومش هاتقدر تلاقيها بعد كدة. حاول تستأذن من الدكتور انك تدخل المعمل وتتعلم لو في وقت فاضي. اكيد هاتلاقي حد هايساعدك. دلوقتي التعامل مع المعدات المعملية مطلوب في السوق قوي.

ثامن نصيحة:
حاول دايماً تختار مجالك اللي انت عندك شغف بيه. لو عندك شغف هايكون عندك هدف وهاتوصل صدقني وهاتقدر تعافر وتتعلم ومايجيلكشي ملل خالص إلا قليل. ماتحاولشي تختار مجال شغلك كدة وخلاص، اختار الحاجة اللي انت بتحبها. حاول تخرج برا دائرة التوهان في فترة الكلية. لازم تكون منفتح وبتسأل هنا وهناك وعندك طاقة لكل ده.

تاسع نصيحة:
حاول تستثمر في وقتك وانت بتدرس في الكلية وتحاول تتعلم الحاجات الخاصة بمجالك واللي بتجهزك لسوق العمل على التوازي مع دراستك. بعد التخرج هاتلاقي إن المسئوليات بدأت تزيد عليك وهاتلاقي إنك مضطر تدور على شغل. وهاتلاقي نفسك تايه وبتحاول تدور على “أسرع طريقة إنك تحصل على فرصة عمل”. وده بيسبب تشتت ليك وكمان بيخليك مش شايف الصورة قدامك. حاول إنك ماتعملشي Career Shift خالص إلا في الضرورة القصوى. وماتلجألهوش أبدأ إلا لو انت مضطر. بلاش تشتت نفسك خالص.