سلام عليكم
هاتكلم في المقال عن حبة نصائح بالنسبة للتعامل مع البطاريات ( خصوصاً لو هاتستخدمهم في مشروع التخرج ).
أولاً: احنا كتير بنشتري بطاريات الليثيوم من أماكن بتبيعها مستعملة وبنستخدمهم بشكل مباشر بدون ما نعملهم Characterization يعني نقيس سعة كل بطارية ونتأكد ان كل البطاريات سعتهم كلهم متقاربة. لإن لو وصلت أي مجموعة بطاريات مع بعض على التوالي ( سعتهم مختلفة عن بعض ) هاتحصل حبة مشاكل زي:
- أثناء الشحن هاتلاقي البطاريات جهدها بيعلى بشكل مختلف عن بعض، يعني هاتلاقي ان في بطاريات بتتشحن اسرع من بطاريات تانية وبالتالي بنسبة كبيرة هايحصل Over Charging لأحد البطاريات وممكن لا قدر الله البطارية دي يحصلها تلف او تؤدي إلى حريق لا قدر الله.
- بردو لو هاتستخدم بطاريات سعتهم Capacity مش زي بعض ومتوصلين توالي مع بعض، أثناء التفريغ هاتلاقي ان في بطاريات بتتفرغ أسرع من بطاريات تانية وبالتالي انت مش هاتستفيد بكامل سعة البطاريات كلها وهاتلاقي ان البطارية اللي بيتم تفريغها بشكل أسرع ممكن جهدها يقل عن الحد المسموح وبالتالي هايحصلها ضرر كبير وممكن تحترق. لو الحمل كبير ممكن يحصل حاجة اسمها Reverse Charging وهي ان البطارية الأضعف بيحصلها شحن بجهد سالب نتيجة وجود الحمل وده بيؤدي إلى كوارث.
- ممنوع تماماً انك توصل بطاريات ليثيوم توازي مع بعضهم وفي اختلاف بين جهود البطاريات. حرفياً هايمر تيار قيمته كبيرة من البطارية اللي جهدها أعلى للبطارية اللي جهدها أقل ( ودي تعتبر كارثة ) والبطاريات هاتسخن وممكن لاقدر الله يحصل حريق.
- ماينفعشي نستخدم بطاريات الليثيوم بأي شكل إلا بدون استخدام دائرة الـ Battery Management System لإن عدم استخدامه بيؤدي إلى مخاطر كبيرة لإن البطاريات نفسها مافيهاش أي نوع من الحمايات والـ BMS هو المتكفل بكل الحمايات زي:
- الحماية من التيار الزائد.
- الحماية من ارتفاع جهد أي بطارية عن الحد المسموح بيه.
- الحماية من انخفاض جهد أي بطارية عن الحد المسموح بيه.
- عملية توازن جهد البطاريات اسمها Cell Balancing وهي ان في دائرة بتراقب جهد البطارية ولو تعدى قيمة معينة بتبدأ توصل حمل على البطارية عشان تقلل قيمة الجهد.
- لازم نكون عارفين ان بطاريات الليثيوم تقدر تديلك تيار لحظي بقيم كبيرة جداً ممكن تعدي الـ 100 أمبير. لازم نكون عاملين حسابنا جداً في مختلف انواع الحمايات للدوائر اللي متوصلة معاها:
- نستخدم فيوز.
- نستخدم Reverse Polarity Protection عشان لو حد وصل أسلاك البطارية بالعكس. طبعاً في الحالة دي كل الدوائر الإلكترونية هاتحترق بالكامل. ده لينك فيه أمثلة لدوائر الـ Reverse Polarity Protection.
- لما نيجي نلحم الأسلاك في بطاريات الليثيوم لازم نستخدم الطرق الصحيحة للحام الاسلاك. المفروض بنستخدم Nickel Strips ونستخدم لحام Spot Welding بالطرق الصحيحة لإن لو استخدمنا مكواة اللحام العادية والقصدير ده هايسخن بطارية الليثيوم ( تخيل بطارية الليثيوم ممنوع درجة حرارتها تعدي الـ 35 درجة مئوية ) ف ما بالك انك تلحمها بمكواة لحام درجة حرارتها عالية جداً ؟!
- بطاريات الليثيوم لازم يتم شحنها بطرق صحيحة ولازم نكون عارفين ان مش كل انواع الـ BMSs بتدعم انها تشحن بطاريات الليثيوم أساساً. لازم نستخدم دوائر الشحن المخصصة. إلا لو الـ BMS نفسه بيدعم انه يشحن البطارية (مواقع صينية كتيرة بتبيع دوائر الـ BMS على انها دوائر بتشحن البطاريات بردو). لازم نكون حذرين.
لو حد عاوز يسألني بخصوص دوائر الـ BMS في السوق وامكانياتها مافيش مشكلة خالص. ممكن تبعتوا بياناتها من خلال صفحة اتصل بي وهارد عليكوا.
اترك تعليقاً